borcdaiocs.valcanale.org

 Al ven di domandâsi il parcè di cheste straordenarie concession che, come vuê, e clamà par secui, cence nissune limitazion, visitadôrs a miârs dal Friûl, da la Carantanie e dal Cragn.  I marcjadants si cjatavin sot la protezion dal patriarcje, libars di cualsisei dazi o “mude”.  Pe sagre a rivavin marcanziis no nome da l’Italie ma fintramai da la lontane Boemie.  Il puint di confin tra Ponteibe e Pontafel al jere viert sei par personis che par robe e tra i bancuts, tai barachins e intes ostariis si incrosavin i lengaçs di chê volte intun messedot fonetic tra il talian, il furlan, il todesc e il sclâf in tes lôr formis dialetâls.

 Par clarî miôr la facende bisugne premeti che il paîs, za tai secui XII e XIII, al veve vût une part impuartant par il colegament tra il Patriarcje di Aquilee e il vescul di Bamberghe, stant che al jere il confin tra i doi ducâts. La strade pontebane e jere doprade, in fat, no nome pal passaç di materiâi e di int di ogni sorte, ma aromaI parcè che e vignive preferide a chê di Mont di Crôs ancje da part di personis famosis e dal stes Patriarcje Beltram che, dal 1338, al passà par lâ a Vilac par un incuintri gleseastic.    

Si capìs che potenziâ la strade pontebane al jere di grant interes pes autoritâts religjosis di chê volte, ven a stâi tra la badie di Mueç e la curie di Gurk e duncje tra Aquilee e Bamberghe, che le meterin dute par rindi plui facile la viabilitât lunc la val de Fele e garantîsi, un cul altri, i trafics e la relative convenience.  Oltri de logjistiche, di sigûr prioritarie inte strategje comerciâl di chei timps, altris fatôrs  a zuiarin a pro di Ponteibe pe sô sagre anuâl, valadì il grant numar di traspuarts lunc la val, la presince di minerâi metalics come la limonite cu lis relativis fusinis di lavorazion dal fier, i strâts di blende e galene e ancje, parcè nò, la nudride cuantitât di salvadi e di prodots agricui e forestâi.  Par di plui no je di sotstimâ  la ferme abilitât dal Patriarcje Beltram, metût a governâ la Patrie dal Friûl, dal 1334, dal Pape Zuan XXII, che al jere so patriot.

 L’elet, dotôr e insegnant di leç a l’universitât di Tolose, al veve za sostignût, cun onôr, incarghis prime de investidure a patriarcje che e fo celebrade a Aquilee ai prins dal mês di març dal 1335.  Fin dal prinzipi al metè in vore une “virga ferrea”, sicu pe rinovazion des investiduris feudâls.  Ma al patriarcje i premeve ancje di recuperâ lis tignudis de Glesie e i colegaments comerciâi cul Nord e cussì, cu lis armis, al tornà a concuistâ Vençon, roche dai conts di Gurize, e il control de rive gjestre dal Tiliment.

Tal stes timp al fasè fuarteçâ i pas alpins, sistemâ la roche Moscarde dongje Paluce e costruî la fuartece di Scluse, clamade roche Beltramine e memoreade da une lapide, inmò vuê incjastrade suntun mûr dal paîs.   Al trasferì a Vençon il paiament de mude, prime paiade a Tumieç e a Scluse, dant ae int di chel lûc la dispense di puartâ lis lôr marcanziis a Glemone.  Chescj e tancj altris favoritisims  par Vençon a vevin il fin di mantignî salt il domini dal patrarcjât e la trancuilitât pe int che e passave su la strade Pontebane.  A lis protestis dal dôs di Vignesie par chestis preferencis, il patriarcje al rispuindè che al veve di dâ sigurece e pâs ai mercjadants che a sielzevin chel percors.

 ntune cun cheste logjiche di protezion de strade de Fele, la Julie Auguste a soreli jevât, e va leade la decision di valorizâ la vile-confin di Ponteibe midiant di un aveniment di riclam e interes come un grant marcjât.   Il biel risultât di chê decision pe tante int presint, al de la conferme di ce tant induvinade che e fo la iniziative.  Si à di pensâ, dut câs, che la Carantanie dal sud e jere ben simpri sot la jurisdizion dal Patraircjât di Aquilee che al rivave fin a la Drau, tant che, in un ciert sens, no si podevin solevâ motîfs di no competence, stant che la sagre davualzude intune fieste religjose, e veve di vê vût, di sigûr, il consens des diocesis di dilà dal confin. 

E la sagre e tignì dûr a vueris, devastazions, taramots, cussì come che ancje vuê e resist al cambiament dai cumerçs, a l’evoluzion dal mût di vivi de int, a la “new economy” :  si che duncje o vin di jessi agrâts al Beât Beltram par chel che al à fat par cheste valade e pai siei abitants che a àn gjoldût de sô opare.